Высакагорская СБ

ВЫСАКАГОРСКАЯ СЕЛЬСКАЯ БІБЛІЯТЭКА з успамінаў жыхароў пачала сваю дзейнасць у канцы 20-ых гадоў як хата-чытальня. У хаце-чытальні былі толькі газеты, таму што іх у вёсцы ніхто, акрамя настаўніка Любецкага М.К., не атрымліваў – не было лішніх грошай. У гады ваеннага ліхалецця бібліятэка была разбурана немцамі. Аднавіла сваю работу ў другой палове 50-ых гадоў. Першым бібліятэкарам была дзяўчына па імені Марыя (дзявочага прозвішча яе ніхто не памятае), якая выйшла замуж за мясцовага хлопца Івана Губіча і пасля вяселля маладыя паехалі на цаліну. Пасля яе на працу прыйшла Надзея Сакава, да вайны яе родныя жылі ў вёсцы Высокая Гара, а потым пераехалі ў канцы 40-х гадоў у Дзмітравічы, аставіўшы сваю хату сельскаму Савету, які і аддаў яе пад бібліятэку праз колькі год. Вось і давялося Надзеі працаваць у сваёй ранейшай хаце.

У жніўні 1963 года бібліятэка справіла наваселле ў спецыяльна пабудаваным будынку. На працу ў родную вёску прыехала Ефімец Мая Мікалаеўна (пасля замужжа Любецкая), якая завочна навучалася ў Мінскім педагагічным інстытуце М. Горкага на бібліятэчным факультэце. У 1967 годзе атрымала дыплом бібліятэкара-бібліёграфа вышэйшай кваліфікацыі. Бібліятэчнай справе Мая Мікалаеўна аддала звыш трыдцаці гадоў. На яе вачах вырасла не адно пакаленне моладзі. Усіх яна вучыла павазе да кнігі, да людзей. Пра яе работу шмат друкавалася публікацый на старонках раённай газеты.

Пачынаць даводзілася з элементарнага. У той перыяд калі Мая Мікалаеўна прымала бібліятэку, у ёй было зусім мала літаратуры. Ды і чытачоў было не так шмат. У асноўным гэта школьнікі і вясковая інтэлігенцыя. А каб наблізіць кнігу да дарослага чытача, прыходзілася прыбягаць да кніганошаў, выходзіць у навакольныя аддаленыя вёскі.

З уваходам сельскіх бібліятэк у склад ЦБС, работа бібліятэкі значна палепшылася. У 1977 годзе на бібліятэчных паліцах налічвалася каля 14 000 тамоў палітычнай, мастацкай, сельскагаспадарчай і тэхнічнай ліатратуры. Паслугамі бібліятэкі карысталася 450 чалавек. Кнігавыдача дасягнула 3365 экзэпляраў. І яна ўсё павялічвалася.

Негатыў дэмаграфічных перамен канца 80 – пачатку 90-ых гадоў выклікаў змяншэнне і колькасць чытачоў. Па выніках 1994 года ў бібліятэцы чытала 360 чалавек, з іх 109 дзяцей. Высакагорская сельская бібліятэка – адзіная бібліятэчная ўстанова на тэрыторыі Высакагорскага сельскага Савета, забяспечвала патрэбы ў бібліятэчнай кнізе дарослага і дзіцячага насельніцтва 13 населеных пунктаў, у якіх пражывала звыш 700 чалавек. 8 вёсак аддалены ад бібліятэкі на 3-12 км, іх жыхары абслугоўваліся з дапамогай кніганошаў з ліку вучняў мясцовай школы. Ва ўмовах нестабільнасці ў грамадстве, эканамічнага крызісу і пераходу да рыначных адносін знізілася і паступленне кніг. За год у бібліятэку паступіла 98 кніг. З кожным годам становішча пагаршалася.

У 1995 годзе Любецкая Мая Мікалаеўна пайшла на заслужаны адпачынак. На яе месца прыслалі пасля заканчэння Магілёўскага бібліятэчнага тэхнікума Гардзейчык Веру Уладзіміраўну, затым са жніўня 1997 па лістапад 1999 года працавала Паўлоўская Валянціна Міхайлаўна. На змену ёй прыйшла Кісялёва Зоя Міхайлаўна. У верасні 2002 года бібліятэку прыняла Болцікава Людзміла Анатольеўна, якая працуе і цяпер. Значная ўвага бібліятэкарам надаецца краязнаўчаму, патрыятычнаму, экалагічнаму выхаванню, прапагандзе здаровага ладу жыцця і выхаванню міласэрнасці. Па гэтых накірунках аформлены шэраг кніжных выстаў і тэматычных паліц, асобна выдзелены фонд дзіцячай літаратуры. У сваёй рабоце Людзміла Анатольеўна імкнецца знайсці цікавыя формы прапаганды кнігі для дзяцей. Цікава праходзяць пасяджэнні літаратурна-выхаваўчага клуба для юных высакагорцаў “Чыталінка”, які пачаў дзейнічаць у 2003 годзе. Формы пасяджэнняў клуба разнастайныя з улікам вобразна-эмацыянальных асаблівасцяў прадстаўнікоў дзіцячага ўзросту. Гэта інтэлектуальна-літаратурныя гульні і віктарыны, кніжныя прэм'еры, урокі чытацкай культуры, трыбуны маралі і этыкету, літаратурныя календары да юбілейных дат знакамітых беларускіх пісьменнікаў.

Не застаецца па-за ўвагай бібліятэкара і такая катэгорыя людзей як адзінока-пражываючыя састарэлыя людзі, інваліды І, ІІ групы, інваліды дзяцінства, удзельнікі Вялікай Айчыннай вайны,шматдзетныя маці, якім Людзміла Анатольеўна дастаўляе кнігі на дом.

Высакагорская сельская бібліятэка, дзякуючы бібліятэкару Болцікавай Людзміле Анатольеўне, стала своеасаблівым месцам, дзе можна карысна і прыемна адпачыць, спазнаць штосьці новае, абмеркаваць кнігу, часопісную публікацыю ці тэлеперадачу, або проста падзяліцца сваімі праблемамі.

У 2007 годзе бібліятэкай уведзены дадатковы новы від абслугоўвання – платныя паслугі за карыстанне камерцыйным фондам. Па выніках 2008 года зароблена 139 700 рублёў. Каб шырэй задаволіць запыты чытаў, выкарыстоўваўся кнігаабмен па УСКА, у выніку чаго было выдадзена 593 кнігі.

У сувязі з рэарганізацыяй у 2008 годзе сельскіх Саветаў, зона Высакагорскага сельскага Савета ўключана ў склад Пагосцкага сельскага Савета. Бібліятэку з прычыны аварыйнага стану будынка перасялілі ў былы сельскі Савет. У 2009 годзе прыпыніў сваю дзейнасць прыбібліятэчны клуб "Чыталінка". На канец 2011 года кніжны фонд бібліятэкі складаў 6 894 экз. друкаваных выданняў, якімі карысталася 250 чытачоў. Кнігавыдача склала 3 765 экз. кніг, часопісаў, газет і іншых матэрыялаў.